Lëvizja Rinore Egjiptiane dhe Rome ka zhvilluar takime koordinuese me drejtorinë dhe stafin pedagogjik të Shkollës “Abdyl Paralloi”, si dhe me prindërit e fëmijëve që do të jenë pjesë e kampit veror, në kuadër të projektit “Hapat e Sigurt – Program Veror për Përmirësimin e Statusit Social-Ekonomik të Fëmijëve në Nevojë në Bashkinë Elbasan”.
Gjatë takimeve u prezantua programi i kampit veror, u diskutua mbi rëndësinë e kësaj nisme për zhvillimin arsimor dhe social të fëmijëve, si dhe u ndanë informacionet mbi mënyrën e organizimit, rregullat e funksionimit dhe aktivitetet që do të zhvillohen gjatë programit.
Sipas organizatorëve, kampi veror synon të krijojë një mjedis të sigurt dhe mbështetës për fëmijët, duke ofruar aktivitete edukative, psiko-sociale dhe rekreative që kontribuojnë në zhvillimin e aftësive të tyre, rritjen e motivimit për të vazhduar shkollimin dhe përmirësimin e mirëqenies së tyre.
Përfaqësuesit e LRER theksuan se bashkëpunimi i ngushtë me institucionet arsimore dhe prindërit është një faktor kyç për realizimin me sukses të programit dhe për krijimin e mundësive më të mira për fëmijët në nevojë.
Një vlerësim i veçantë iu shpreh Drejtorisë dhe stafit pedagogjik të Shkollës “Abdyl Paralloi” për bashkëpunimin dhe angazhimin e treguar në organizimin dhe zbatimin e kësaj nisme.
Projekti “Hapat e Sigurt – Program Veror për Përmirësimin e Statusit Social-Ekonomik të Fëmijëve në Nevojë në Bashkinë Elbasan” zbatohet nga Lëvizja Rinore Egjiptiane dhe Rome (LRER) me mbështetjen e Fondacionit Albanian Besa Capital.